Før kampen: Hødd–Haugesund

Kampen vert spelt på Høddvoll laurdag 18. april klokka 14.00, og billettar kan kjøpast her. Han vert òg vist på TV 2 Play.

Det er klart for storkamp på Høddvoll når opprykksfavoritten Haugesund kjem på vitjing. Klubbane møttest sist i cupen i 2012, då Hødd vann borte i kvartfinalen og sidan vart noregsmeister. Då spelte Sivert Heltne Nilsen for Hødd, og OBOS-ligaens største profil returnerer no til Høddvoll med Haugesund. I ligaen er det heile 18 sesongar sidan Hødd og Haugesund møttest.

Hødd vann serieopninga 2–1 heime mot Sandnes Ulf framfor 1113 tilskodarar på Høddvoll. Isak Skotheim og Sean Nilsen-Modebe skåra for Hødd, i det som òg var debuten til Felt Blå.

I helga vart det tap i årets første bortekamp mot Moss. I ein sjansefattig kamp på graset på Melløs var det heimelaget som fann nettmaskene éin gong. Dermed står Hødd med tre poeng etter dei to første kampane, noko som må seiast å vere ein grei start.

Haugesund rykte ned i fjor etter 16 strake sesongar i Eliteserien. Kvittrøyene ønskjer å gjere opphaldet i OBOS-ligaen så kort som mogleg, og har signert sterkt rett før seriestart. Tidlegare Hødd-favoritt Sivert Heltne Nilsen kom frå Aberdeen, medan Niklas Sandberg og Stian Molde kom frå høvesvis Sarpsborg 08 og Fredrikstad.

Det har resultert i to strake sigrar i seriestarten: først 4–2 borte mot Lyn, og deretter ein sterk 4–2-siger heime mot Strømsgodset førre helg. Sory Diarra har vore eit fyrverkeri på topp. Landslagsspelaren frå Mali står med fem skåringar og éin målgjevande pasning til no.