Skal løfte tribunekulturen
Både Blåsarane og miniBlå flyttar opp på hovudtribunen som eit tiltak for å løfte stemninga og tribunekulturen på Høddvoll. Billettar og kampdagsinfo Blåsarane miniBlå Hødd-supporter
Enden av E-feltet vert gjort om til ståplassar med safe standing og får namnet Felt Blå. Den øvre delen av Felt Blå er sett av til Blåsarane. Den nedre delen er sett av til miniBlå. På Felt Blå vil det verte lagt til rette for både tifo og pyro.
Hødd og supporterane legg opp til eit tettare samarbeid, meir nyrekruttering og saman løfte kampdagsopplevinga for alle på Høddvoll – både visuelt og lydmessig.
– Vi må tenkje nytt for å løfte tribunekulturen på Høddvoll og for å få med fleire. Vi trur at ved å flytte til Felt Blå på hovudtribunen vil vi få meir rekruttering og oftare få med oss hovudtribunen til å skape trøkk og stemning. Blåsarane set stor pris på at det no vert eit tettare samarbeid med klubben for å løfte tribunekulturen, seier styreleiar Guttorm Remøy Vartdal i Blåsarane.
Supportarar på Felt Blå vil kunne nytte både inngang 1 og inngang 2 på hovudtribunen.
Klubben har i tillegg planar om bruk av fleire store og små flagg, eigne genserar til miniBlå, tilrettelegging for borteturar og ser på moglegheita for ein fast samlingsplass for supporterar i Oslo-området både på heime- og bortekampar.
