SINDRE EID GIR SEG SOM TRENAR I HØDD – HELD FRAM I HØDD FOTBALL

Hovudtrenar Sindre Eid gir seg som trenar for Hødd sitt herrelag. Han har vore klubben sin hovudtrenar sidan 2017. Sindre var også hovudtrenar i 2014 og 2015, då klubben tapte kvalifisering om opprykk til Eliteserien etter straffesparkkonkurranse. Sindre var også assistenttrenar når Hødd var cupfinalen i 2012.

Sindre har fast stilling i klubben som marknadssjef i tillegg til trenarjobben. Han skal halde fram i stillinga som marknadssjef og vil også få andre viktige oppgåver innanfor sport og klubbutvikling.

- Hødd Fotball er svært takksame for jobben Sindre har gjort som hovudtrenar for a-laget. Han har lagt ned ein stor innsats og laget har hatt ei flott utvikling. I 2018 var vi eit mål i siste kamp frå kvalifiseringsspel til opprykk og vi tapte straffesparkkonkurranse i Bodø i kamp om kvartfinaleplass i NM. Vi har fått fram mange unge og lovande lokale spelarar dei siste åra og desse vil ha viktige roller i åra som kjem. Sindre har vore ein viktig faktor til dette. Vi er svært glade for at Sindre blir med vidare og spelar ei viktig rolle i klubben, seier dagleg leiar Oddmund Davik Otterlei.

Styreleiar Ivar Morten Normark er også glad for at Sindre blir i klubben vidare:

- Styret aksepterer Sindre si avgjerd og er glade for at han med sin kompetanse og erfaring held fram i viktige roller i Hødd også i framtida.

Sander H. Nyland, Jesper Törnqvist og Frode Gjerde vil leie laget i trening og kamp framover.

For meir informasjon kontakt:

Oddmund Davik Otterlei, 48259191
André Nevstad, 92222225
Sindre Eid, 95708212