Siger mot serieleiar Nardo

A-laget tok sin tredje strake siger etter ein kamp der laga hadde kvar sin omgang. Hødd var best i første, medan Nardo var best i andre.

Nardo fekk kampens første moglegheit då ei heading gjekk svakt midt på keeper Jan Lennart Urke. Vidare fekk Hødd sine første sjansar etter kvarteret, då Bendik Rise først avslutta via ein forsvarar og til corner. Corneren enda hos Didrik Sereba som avslutta over målet til Nardo-keeper Henrik Bakke. Like etter fekk Nardo si andre moglegheit, då ei heading gjekk utanfor målet til Urke. Etter halvtimen kombinerte Rise og Torbjørn Kallevåg fint både éin og to gongar. På det andre forsøket scora Kallevåg sikkert etter ein fin vegg med nemnte Rise. Vidare hadde Sereba to gode sjansar før pause, men ingen av sjansane resulterte i mål. Hødd leia dermed fortjent 1-0 til pause.

Etter 52 minutt fekk Nardo sin største sjanse i kampen, då Morten Strand chippa gjennom Christoffer Engan. Keeper Urke måtte slå til med ei god redning. Vidare fortsatte Nardo å styre kampen, og etter halvspelt andre omgang fekk kaptein Albert Berbatovci ei god moglegheit, men avslutninga blei for svak. Nokon minutt før sjansen til Nardo-kapteinen kom ein livleg Amani Mbedule inn. Etter 78 minutt slo han til med ei god vending og eit godt skot, men avslutninga gjekk like utanfor. Rett før slutt var Amani nok ein gang involvert, då han forserte på venstresida før han slo inn til Hødd sin andre innbyttar, Sondre Beite. Beite avslutta godt forbi keeper Bakke, og dermed enda det 2-0 på Høddvoll!

Allereie onsdag er det ny heimekamp, då Molde kjem på besøk i cupen. Kampstart 18:00.

KAMPFAKTA
Hødd - Nardo 2-0 (1-0)

1-0: Torbjørn Kallevåg (31 min)
2-0: Sondre Beite (89 min)

6.runde PostNord-ligaen. Dommar: Sulman Maroof Hussain. Tilskodarar: 1177. Gult kort: Steffen Moltu, Hødd.

Hødd (4-3-3): Jan Lennart Urke - Martin Mork Breivik, Jesper Törnqvist, Steffen Moltu, Preben Sætre - Bendik Torset, Henrik Breimyr, Torbjørn Kallevåg - Bendik Rise, Magnus Myklebust (Amani Mbedule frå 68), Didrik Sereba (Sondre Beite frå 68).

Nardo (4-3-3): Henrik Bakke - Sander Nordeide, Jonas Lindgård, Martin Lundal, Jørgen Solli - Albert Berbatovci (Ole Andreas Skogvold frå 88), Henrik Dahlen (Øyvind Pettersen frå 74), Morten Strand - Christoffer Engan, Daniel Bekkevold, Mats van der Weel (Bendik Lysvåg frå 65).