Siger i toppkampen mot KFUM!
Laurdag kveld møttes Hødd og KFUM til toppkamp på Høddvoll. Det enda med siger til vertane!
Det var mykje spenning knytta til laurdagens kamp på Høddvoll. Heimelaget låg på toppen av tabellen før kampstart, medan KFUM "jaga" i utfordrarposisjon. I tillegg følte nok Hødd at dei hadde ein del å revansjere etter 1-3-tapet i Oslo i vår.
I den kraftige vinden på Høddvoll var det KFUM som starta best og dominerte første halvdel av 1. omgang. Gjesta pressa høgt i store delar av omgangen og lukkast med det, og heimelaget sleit med å finne ut av KFUM sitt press. Dominansen førte etter kvart til ei fortent 1-0-leiing til gjestane. Henrik Breimyr var uheldig i ein duell med KFUM-spill Moses Mawa. Førstnemnte kom borti ballen med handa og dommaren dømte straffespark til gjestane. Straffesparket sette Robin Rasch sikkert i mål til 0-1.
Etter scoringa jobba heimelaget seg meir inn i kampen, utan at dei på nokon måte hadde initiativet i kampen. Det vart etter kvart ein jamnare omgang i den kraftige vinden på Høddvoll, men trass i sjansar til begge lag vart det ikkje fleire scoringar i første omgang. 0-1 stod seg til pause.
Etter pausen endra kampbildet seg litt. I denne omgangen var det heimelaget som hadde vinden i ryggen og dominerte kampen. Utlikninga kom i det 51. speleminutt - nok ein gong på straffespark - etter at Markus Naglestad vart takla inne i 16-meteren. Naglestad sette straffesparket sikkert i mål.
Utlikninga verka å gi meir energi til heimelaget. Kampen bølga periodevis litt fram og tilbake, men det var Hødd som skapte dei største sjansane. Begge lag verka å gå for sigeren, men Hødd brann eit par store sjansar, medan KFUM mangla presisjon på siste tredjedel av bana.
Det verka som om kampen skulle endre 1-1, men på overtid fekk Hødd eit frispark i god innleggs- og skotposisjon. Markus Naglestad stilte seg opp for å ta frisparket. Sørlendingen såg at keeper stod litt feilposisjonert og banka ballen hardt i nærmaste hjørne - 2-1 var eit faktum til stor jubel på Høddvoll! Like etter blåste dommaren av kampen!
Hødd: Alme, Haugan, Breimyr, Moltu, Eid, Saunes, Wrele (A. Breimyr, 46 min.), Hagen, Rise, Myklebust (Osvold, 72 min.), Naglestad.
Vi takkar KFUM, dommartrio og publikum for kampen, og ønsker lykke til vidare i sesongen!
Neste heimekamp for Hødd er mot Egersunds 01. september kl. 17.00.
