Marius Hagen klar for Hødd

Marius Hagen (25 år) har signert ei toårskontrakt med Hødd. Han kjem frå Elverum, der han i 2017-sesongen spelte 27 kampar og scora 5 mål. Marius kjem frå Nordfjordeid og gjekk gradene i moderklubben Eid. Han har seinare spelt for blant andre Hamkam, Husqvarna FF og Kristiansund BK.

Etter å ha vore innom og trena med laget i november var Marius godt nøgd då vi signerte avtalen: - Eg føler no at eg er komen heim. Eg og sambuaren min gledar oss til å flytte til Ulsteinvik og slå oss til ro her. Og eg har lyst til å bidra til at Hødd rykker opp igjen til OBOS-ligaen neste år.

Sportssjef André Nevstad er nøgd med at Marius blir ein del av Hødd-stallen:

- Marius er ein spelar med mykje erfaring frå OBOS-ligaen, ein god fotballspelar som er tøff i stilen, god i lufta og kan spele både i den djupe rolla, men også i ei offensiv midtbanerolle. Han er ein spelar som vi trur, både i forhold til alder og ferdigheiter vil passe godt inn i Hødd-stallen.

Vi ønskjer Marius og sambuaren velkomne til Hødd og Ulsteinvik!

Spørsmål kan rettast til sportssjef André Nevstad på telefon 922 22 225.