Manaf Rawufu klar for Hødd
Hødd har signert ein avtale med den unge angrepsspelaren Manaf Rawufu som strekkjer seg ut 2026-sesongen. Toppfotball
Rawufu var på besøk i Ulsteinvik denne veka og signera no ein avtale med klubben ut 2026-sesongen.
- Etter gode referansar frå kontaktar i Sverige og eit besøk hos oss, har vi signert Manaf på ein kontrakt ut 2026. Han er ein ung og spanande profil som har krydder i spelet sitt med fart og x-faktor. Vi gler oss til utviklinga vidare saman, seier dagleg leiar og sportssjef i Hødd – Jesper Törnqvist.
Rawufu: – Hødd har vist ein god plan for meg
Den svenske spelaren ser fram til å ta neste steg i karrieren i Hødd:
- Eg har valt å skrive under for Hødd fordi dei har kome med ein god plan for meg og vist interesse. Eg kjende meg med ein gong veldig velkomen, både av klubben og spelargruppa. Det verkar å vere ein fin gjeng med spelarar og leiarar.
- Eg ønskjer å utvikle meg som spelar og bli betre for kvar dag, samstundes som eg kan bidra til å løfte laget, seier Rawufu.
Marius: – Eit stort uforløyst potensiale
Hovudtrenar Marius Bøe er også glad for signeringa:
- Manaf er ein spelar som har gått gradene i AIK sitt akademi, der han scora over 60 mål på 90 kampar på ulike nasjonale ungdomsnivå. Deretter vart han henta til Norrköping for å ta steget inn i vaksenfotballen.
- No starta eit nytt kapittel i Ulsteinvik. Manaf skal inn i eit trygt og godt utviklingsmiljø, der det skal jobbast med å vidareutvikle eit stort uforløyst potensiale. Vi gler oss til å sjå han i Hødd-drakt.
Vi ønsker Manaf velkomen til Hødd!
