Åtte Høddarar på landslag
Fire noverande og fire tidlegare Hødd-spelarar er denne landslagspausen tatt ut på landslag. NFF
Bror Riise er tatt ut i Noregs U15-landslagstropp som møter Sverige til dobbeltkamp 30. september i Sarpsborg og 3. oktober i Fredrikstad. Riise fekk sin A-lagsdebut for Hødd i cupkampen mot Træff. Elles har midtstopparen hatt kampkvardagen sin på rekruttlaget og Hødd G15 Nasjonal denne sesongen.
Charles Ondo har reist for å representere Ekvatorial-Guinea, som skal spele to kvalifiseringskampar til Afrikameisterskapen (AFCON) i september. Ekvatorial-Guinea møter forrige sommars VM-deltakar Den demokratiske republikken Kongo 24. september, før Sierra Leone står på motsett side 28. september. 22-åringen står frå før med åtte A-landskampar for Ekvatorial-Guinea.
Ekvatorial-Guinea har kvalifisert seg til dei tre siste Afrikameisterskapa, med semifinale som beste resultat i 2015. Landet er nummer 105 på FIFA-rankinga.
Manaf Rawufu har reist på landslagssamling med Togo U23, som møter Libya til dobbeltkamp 30. september og 6. oktober. Det er første gong Manaf representerer foreldra sitt heimland.
21-åringen har scora i Hødd sine to siste kampar, mot Træff og Kongsvinger, og står med tre mål i årets OBOS-liga. Togo ligg i Vest-Afrika og har rundt 9,5 millionar innbyggjarar. Den eldre garde av Hødd-supporterar hugsar nok også då Emmanuel Adebayor og Togo deltok i VM i Tyskland i 2006.
Oscar Buur er tatt ut på Danmark U20 for første gong. 19-åringen, som er på lån til Hødd frå FC København, har i fleire år vore landslagskeeper på yngre landslag. Buur og Danmark U20 møter Brasil 28. september og USA 4. oktober.
Mille Viken er tatt ut til J17-VM i Marokko i oktober. Ulsteinvik-jenta spelte i Hødd fram til overgangen til Stabæk i fjor, og har også representert Noreg på yngre landslag tidlegare. Noreg J17 møter Canada, Brasil og Ghana i gruppespelet i VM.
Andrine Nevstad er nok ein gong tatt ut på det norske A-landslaget i futsal, som skal ut i EM-kvalifisering. 28-åringen frå Ulsteinvik spelte i Hødd fram til 2020, og er no futsal-proff i spanske Albacete. Noreg møter Ukraina, Polen og Belgia i kvalifiseringa.
Ørjan Håskjold Nyland og Fredrik Aursnes er med i A-landslagstroppa til Noreg som skal møte Danmark, Portugal to gonger og Wales i Nations League.
Vi ynskjer alle åtte Høddarar lykke til med landslagsoppdraga!
